男朋友求婚後第一件決定好o既事就係揀pre wedding公司，一開始我已經想去韓國影，因為韓式無論髮型妝容都比較清淡自然，o岩我自己多d～先前朋友都係響首爾studio影，但我想影戶外，因為有得周圍去欣賞自然風景之餘仲有攝影師幫我地揸機，哈哈，先前旅行去過濟州覺得好靚~所以最終上網搵下搵下就搵到one plus one了。

我地同負責人bonnie面談時都好順利，見到唔同studio相都各有各靚都1516唔知邊個最o岩我地，bonnie聽完我地鍾意o既style之後就幫我地分折到底適合邊個studio，由於我地想影蕎麥花，但又唔知咩月份有，佢仲即場幫我地打去韓國果邊問，但當然講唔實，只可以話大概時間。join左之後老實講都有少少擔心，始終身邊無朋友試過，上網又唔多人討論(剛開始搵結婚資料仲未識得黎esdlife)。

我地個package包左3晚酒店，但我地諗住順便去埋旅行，問左1+1可唔可以幫我地book多幾晚酒店，佢地話可以而且報價仲比酒店網站平，咁梗係搵佢地幫手啦~所以基本上真係自己買張機票就可以出發了～最記得去到濟州睇天氣預報，我地原定影相果日預告會有雷雨，我又將我o既擔心話比1+1知，之後佢地都有幫我check住天氣，第二日仲同我講話預報變左晴天叫我地唔洗擔心。

終於來到拍攝當日，翻譯朴小姐一早已經來到大堂等我地，先車我地去化妝同揀禮服，沿途佢係咁講一d陣間影相的注意事項，成程車都好輕鬆愉快，去到女仔先去化妝，成個過程我都交哂比佢地話事，因為我都唔係好識化妝依門學問，化出黎都好自然，對眼係痴單株假眼睫毛的關係所以好輕身唔浮誇，化好妝後就去set頭，所謂set頭其實係幫我夾鬈髮方便陣間係戶外換好婚紗影相前助手容易d set頭。Set緊頭時朴小姐比左啲紅豆包我食，又拎暖水比我飲，由於已經化好妝，我怕會整花個唇妝，諗緊點算之際佢同我講放心食啦，陣間出戶外會補唇色的。我仲問佢d包要幾錢，想比番錢佢，點知佢同我講話package包埋架，咁我就放心食啦～哈哈..係我set頭o既時間我男朋友都化妝set頭，之後我再去回合佢就一齊去揀男仔禮服，然後到女仔揀婚紗。

佢地會按你o既身型拎d款比我地睇下，如果覺得鍾意就試，我地分別都試左好幾套，試完如果覺得有d咩唔太好就再同佢地講，之後佢地會再拎d出黎，我地各自都試左好幾套先o岩心水，所有工作人員態度都好好，無話見你仲未揀岩就比臉色你睇～由於我先前未著過nube bra，我係香港買左個平平的去，當日先第一次著，佢地覺得我個nube bra唔夠承托，仲即刻補個無帶bra比我等出黎個線條靚d～

揀好哂衫我地就等攝影師黎，依個時間朴小姐就將我地揀o既衫影比攝影師睇，幫我地pack好哂d野入一個大袋度，然後有樣好貼心o既係佢地考慮到新娘著住高跟鞋行石路沙灘等其實好難行的，佢地就拎左對o岩我碼數的白色高跟涼鞋比我，即刻舒服好多，哈哈…之後仲送左束鮮花球比我地影相用，開頭以為就係一束花球走天崖，後來先知原來每個場景都會再換上其他假花束，仲要唔單止女仔，連男仔的襟花都會跟住轉，驚喜~

影pw之前聽身邊朋友都話會好累呀各樣，我地又覺得ok喎~基本上一到站，係車上換好衫就坐o係車旁邊，隨行助手就會幫我補妝set頭，不得不讚set頭好勁，好快就轉好而且我都好滿意，其實我自己都準備定少少相，諗住如果有咩唔滿意就拎d相出黎話我想咁整，但自從我見第一個頭set得咁好，之後每個頭我都好放心交哂比佢地決定，畢竟有時我覺得靚o既又未必適合自己，有時放心交比專人都未嘗不可。佢地個車尾箱勁多道具 頭飾 領呔煲呔 襟花假花，又係好驚喜～正午太曬時佢地仲唔知係邊度變左把遮出黎遮住我，黃昏係樹林因為凍，佢地又拎外套比我彼住。其實我見我自己都可以一手拎拖尾裙一手拎高跟鞋，但助手都話唔好，佢幫我拎住對鞋。總知當日佢地真係好好照顧，我地一影完上車去下個場景，朴小姐就係咁叫我地食佢地預備好o既食物，香蕉 雞蛋 茶 飯團，又比我地睇佢剛才用手機拍o既花絮…好快就順利影完了，可惜諗走忘記左同佢地影張合照TT

拍攝完畢後扑小姐送我地返酒店，沿途仲向我地推介濟州有咩美食🤤，依個時候我發現我應該漏左件衫係婚紗店，朴小姐即刻打去幫我確認，佢話確認後無論有無都會再覆我，結果佢話我知真係漏左，佢話明天再送黎酒店比番我，好好呀‍♀️～

返到香港收原相時，遇到unzip唔到o既問題，我地同1+1來來回回好幾次溝通最終解決左，感受到佢地係會好好跟進個問題。原相都有千幾張，依對攝影師影出黎o既風格我地都好滿意，我地唔係好識擺pose，正正因為咁揀佢地就真係好o岩，因為佢地捕捉到我地最自然o既一面，千幾張相裡面除左有pw一般常見pose外，仲有好多係將我地之間互動o既一瞬間拍下來，雖然果d表情唔係最靚但就係最真實o既我地，拍婚紗相就係想要依種感覺啊

比啲原相大家睇下啦