上年夏天係濟州旅行既時候已經被濟州既風景深深咁吸引住，所以係心底裡已經決定左要去濟州影pre wedding，而目標就係影到蕎麥花或者繡球花。

 

初初諗住兩種花影到其中一種都已經好開心，因為我以為蕎麥花係秋天先有（原來5-6月都有架），多謝bonnie建議我地揀6月初去濟州影相，趁住蕎麥花未謝，繡球花剛剛開，令我地可以一輯相影到晒兩種花。

 

出發之前我好緊張，成日上ig check住濟州開花實況同天氣，畢竟濟州天氣實在太變幻無常，今日好天聽日可以落大雨。

 

懷住忐忑既心情飛去濟州，check-in酒店時收到one plus one準備既innisfree mask等我地補補濕，第二日影相可以有最佳狀態。

 

好好彩影相果日全日放晴，上晝8點鐘翻譯姐姐就黎酒店接我地，然後女仔先去化妝set頭，男仔都去化少少妝。因為我識少少韓文，化妝set頭既個半鐘同負責既姐姐傾下計嘻嘻哈哈好快就過。

 

然後就去揀婚紗，大家係出發前記住係one plus one d相裡面揀下自己鍾意咩款既婚紗，再cap圖，咁就可以make sure自己著到想要既裙。當然果度既負責人會根據你既style、身形同影相既地方俾專業意見。基本上係3款裙（2款婚紗+1款輕婚紗/vintage dress），每款你可以試2條，然後2揀1，唔使20分鐘就揀好裙。係試婚紗既房間裡面仲放在個鮮花花球俾我外影用，我超鍾意呀有粉紅色既鬱金香！

 

之後就過隔離幢樓揀男裝，試4款西裝揀2款，tie或bow tie係外影轉景點時候會換既。

 

揀好晒所有野就坐定定食翻譯姐姐買既飯捲，攝影師同助手小姐好快就到，同我地confirm外影路線。話說果日好曬，攝影師知道我男朋友會怕熱，建議我地將綠茶園轉做樹林，會無咁曬，好細心，而樹林影到既野都好多變化，好慶幸有聽攝影師建議。

 

我地大約12點半出發，正值最曬既時候，所以去左樹林小路同樹林先，然後先去影蕎麥花、繡球花同海邊。每到一個景點助手小姐都會幫手轉頭飾，最佩服佢用現場既花即時做花環，同埋好似魔術師咁變好多道具出黎，豐富畫面。

 

最驚喜係影蕎麥花既地方，剛好有薰衣草盛放，攝影師即時帶我地去影埋薰衣草，好開心！由於花田無遮無擋超級曬，翻譯姐姐驚我曬紅即刻幫我搽防曬，助手小姐又借私人手巾仔俾我男朋友印汗。佢地其實都係同我地一齊曬，但都盡心盡力幫我地擺好裙擺，叫我地笑，幫我地轉道具，真係好多謝佢地。之後果日我同男朋友自己去濟州景點影相，好掛住有佢地照顧既時間呢！

 

影完相大約一星期就收到晒所有untouched相，以下都係untouched相黎架，未執已經好好喇。